Kírópraktík á meðgöngu – stuðningur við líkamann í miklum breytingum

Meðganga er einstakt tímabil þar sem líkaminn tekur ótrúlegum breytingum á tiltölulega stuttum tíma. Kviðurinn stækkar, þyngdarpunkturinn breytist, liðamót og liðbönd verða mýkri og álagið á bak, mjaðmir og grind eykst.

Þessar breytingar eru eðlilegur hluti meðgöngunnar – en þær geta líka valdið verkjum, stirðleika og óþægindum.

Þar getur kírópraktísk meðferð verið möguleiki sem barnshafandi konur nýta sér til að styðja við líkamann á meðgöngunni.

Hvað gerist í líkamanum á meðgöngu?

Eftir því sem líður á meðgönguna breytist líkamsstaðan smám saman. Þegar maginn stækkar færist þyngdarpunkturinn fram og líkaminn aðlagar sig að breyttu álagi.

Á sama tíma verða ákveðin liðamót og liðbönd sveigjanlegri vegna hormónabreytinga. Þetta er mikilvægt fyrir eðlilega aðlögun líkamans að meðgöngu og fæðingu, en getur einnig stuðlað að líkamlegum óþægindum.

Algengt er að barnshafandi konur finni fyrir verkjum eða stirðleika í mjóbaki og grind. Fyrir sumar getur verið erfitt að finna þægilega stöðu til að sitja, standa, ganga eða sofa.

Hvernig getur kírópraktísk meðferð aðstoðað?

Markmið meðferðar á meðgöngu er fyrst og fremst að styðja við hreyfigetu og líðan móðurinnar þegar líkaminn aðlagast breyttu álagi.

Meðferðin getur meðal annars beinst að:

• mjóbaki og mjaðmagrind
• mjöðmum
• brjóstbaki og hálsi
• hreyfigetu í hrygg og liðamótum
• vöðvaspennu
• líkamsstöðu og hreyfimynstri

Rannsóknir benda til þess að kírópraktík, þar á meðal hnykkingar, geti hjálpað konum með verki í mjóbaki og grind á meðgöngu. Mikilvægt er að líta á meðferðina sem hluta af heildrænni nálgun, frekar en töfralausn við öllum óþægindum meðgöngunnar.

Hvernig fer meðferðin fram?

Meðferð á meðgöngu þarf að taka mið af því að líkaminn er stöðugt að breytast.

Í fyrstu heimsókn er farið yfir heilsufar, meðgönguna, einkenni og fyrri sögu. Síðan er metið hvernig líkaminn hreyfist og hvar helst er að finna skerta hreyfigetu eða aukið álag. Meðferðin er síðan aðlöguð að meðgöngulengd og líðan konunnar.

Kírópraktor sem sinnir barnshafandi konum getur notað ýmsar mildar aðferðir, þar á meðal hnykkingar og mjúka liðkun. Oft eru einnig notaðar sérstakar púðar til að koma konunni þægilega fyrir. Það er ekki markmiðið að þrýsta líkamanum í ákveðna stöðu, heldur að vinna með líkamann á öruggan og þægilegan hátt.

Markmiðið er einfalt:

Að hjálpa verðandi móður að líða sem best í eigin líkama á meðan hann undirbýr sig fyrir eitt stærsta verkefni lífsins.

– Alexandra Ósk Ólafsdóttir, Kírópraktor